8e Oeetreiking Sjeeter Grieënlächer gesjlaagd.
Op d'r 29e jannewari 2012 woar 't gezellig druk in os Residentie 't Sjtreëperkruuts.
Sjpeciale gast woar 't José Janssen, want op dizze oavend zou 't José gedecoreerd weëde als 8e laureaat van d'r Sjeeter Grieënlächer.
Bij d'r igank woeete de gaste ontvange mit ee glas broesende wieen. Mit en mit leep 't Sjtreëperkruuts vol.
Vuur zoge ieëder gedecoreerde noa binnen kome woa-onge D'r Bargoesnkloep, De sjtichting Brugke va vrundsjap, d'r Jack Schiffelers en d'r Jo Sjtorms, mar vuur mochte och ozze sjtaatse Sjeeter Prins Peter II mit zieng familie d'r Jeugdprins Jordy en d'r ganse Schaesbergse Vasteloavendsverrein begroete.
't José woar natuurlik onger begeleiding van d'r Bert, ozze ex-burgemeester en nog get familie en vrung doa. En d'r Prinse Road zelf woar och mit ongeveer 20 sjtaatse oad-prinse d'rbij. Noa de verwelkoming durch d'r vuurzitter van d'r Prinse Road kreeg 't José ee moezikaal sjtendje gebrach mit ozze letste sjlaager. 'In Limburg' En toen koam daan oeeteindlijk de Laudatio.
't Grieënlächercomité probeert doa-aa ummer op ing biezonger maneer ivulling te geëve.
Dit joar houwe vuur d'r Jacques Schiffelers bereid gevoonge op ing sjpeciaal maneer ing sjun laudatio oeet te sjpreëke. En dat hatte gedoa. Durchsjpekt mit anekdotes en vol humor vertelde heë 't José en alle aanwezige woarum 't José als ieëtsjte vrouw dizze biezongere orde van d'r Prinse Road in ontvangst moch neueme. Mit name de verdeenste vuur Theater Landgraaf, d'r Literaire brunch, Unicef, de bibliotheek en 't Roeë Kruuts woeete aagehold als reë vuur de nominatie.
Ozze ieëre vuurzitter d'r Jo Sjtorms hong de orde um, same mit ing oorkonde en ee juryrapport woar de oeetreiking kompleet. Natuurlik houwe vuur och gedach an ee prachtig boeket blomme en ing sjun flesj wieen vuur d'r Bert Janssen.
Doanoa hant vuur os same mit alle aanwezige nog ee paar sjtundjes geamuseerd.
Mit dees oeetreiking kin d'r Prinse Road teruukzieë op ing gesjlaagde activiteit en ing sjtolze draagster van d'r Sjeeter Grieënlächer.
't José Janssen-Bouma
